Inin 2019, kiwika yi 500 xiwitl opehki tlahyowilistli tlen okiwalikakeh kaxtiltekameh ipan Mesoamerika, kanin axan itoka Mexihko. Ipan 1519, Hernán Cortés iwan itlakewalwan, oahsikoh itenpan Veracruz iwan opehkeh onehnenkeh ompa tlahkotipan Mexihko. Ipan ohtli kan opanohkeh, omokah miak tlahyowilistli iwan mikilistli, tlen owehkah makuilli xiwilpilli. Axan, kolonialyotl ok nikan kah. Yeh iwan tinemih timasewalmeh, pampa ok miak techtlahyowiltiah nikan Mexihko. Ok techtlalchipachowah, iwan kinchihchikoittah tonemilis, toolocholis iwan totlahtolwan. Axan, masewalkonemeh ok moneki kiseliskeh achto, tlahko iwan weyi tlamachtilistli ika pinotlahtolli, amo ika innantlahtol. Ok kateh miakeh owihkayohmeh tlen kichiwah masewalmeh amo kiselih melahkayotl, tepahtilistli, iwan tlamachtilistli. Axan, miakeh ok kineltokah masewaltlahtolmeh iwan masewalnemilistli kateh folklor iwan amo yoltokeh. Mayeh ihkon, timasewalmeh ok nikan tikateh, timolochohtokeh iwan tomochikawaltihtokeh. Timoketzaltiah itech itlapololis kolonialyotl. Totlahtolwan yoltokeh iwan mochikawaltihtokeh okachi miak.
Ik inon, oksepa, weyi tlamachtiloyan Universidad Veracruzana, iwan Universidad Veracruzana Intercultural, kinnnotzah nawatlahtohkeh, ma wallakan itech inin 5pan Nawanechikolistli, kampa okachi tikchikawaltiskeh olocholistli tlen
tekipanohtokeh pampa iyolitilis, iyankuitilis iwan iyektlalilis nawatlahtolli.
 |
 |
