Inin 05 iwan 06 tlen noviembre tlen opanoh, kaltlamachtiloyan Universidad Veracruzana Intercultural, Wextekapan Tlalli, okichih[1] Inik se Nawatlahtolnechikolistli itech Veracruz, kanin omotlapowihkeh, omokamawihkeh iwan okuanemilihkeh ken wel tikyektlaliskeh itlahkuilolis nawatlahtol, iwan itlamachtilis, iwan ken wel tikchikawiliskeh masewaltlahtol itech kaltlamachtiloyan. Inin tekitl omochih[2] ihtik weyi ilwitl kampa UVI okahxili mahtlaktli xiwitl tlen opehki. Noihki inin tekitl kipalewia pampa masewaltlahtol amo ma mopoloh, amo ma moilkawa iwan amo ma moachiwa itech inin tlalnankotonalli Veracruz.
Kanah nawipowalli momachtihkeh okatkah ich inin nechikolistli. Okachi miakeh okamatiayah, otlapowayah nawatl iwan kastiyatlahtolli. Noihki okimatiayah oksekimeh masewaltlahtolmeh. Owallahkeh momachtihkeh tlen Wextekapan, Wehweyi Tepemeh iwan Selvas tlalmeh, iwan ihkon okichihkeh se tlanohnotzalistli intercultural iwan interdialectal. 80% tlen omochih, okichihkeh ika nawatlahtolli. Inin amo keman achto okichihkeh oksekan. Amo moixmati okse kaltlamachtiloyan kanin omochih se tlanohnotzalli itech nawatlahtol kanin nochi ixtlamachilistli omochih ika nawatl. Noihki otikpixkeh tlahtolkuepkeh akimeh okinpalewihkeh yehwan[3] akimeh amo okimatiayah nawatl.
Itech nechikolistli, otekipanohkeh tlamachtihkeh Mtro. Félix Antonio Jauregui (tlayakanki itech tlahtolixtlamachtiltlachialistli ompa Selvas), Dr. Rafael Nava Vite (tlayakanki itech tlahtolixtlamachtiltlachialistli ompa Wehweyi Tepemeh), Mtro. Carlos Octavio Sandoval Arenas (tlayakanki itech tlanawatilixtlamachtiltlachialistli ompa Wehweyi Tepemeh), Antrop. Jose Alvaro Hernandez Martinez (tlayakanki itech tlahtolixtlamachtiltlachialistli ompa Wextekapan Tlalli), Mtra. Daisy Bernal Lorenzo (tlayakanki itech normalizacion lingüística ompa DUVI), Dr. Miguel Figueroa-Saavedra Ruiz (tlatemohki itech Instituto de Investigaciones de la UV) iwan Mtra. María Isabel Miranda Landa (tlayakanki itech Seguimiento Académico ompa DUVI).
Inin tekitl opehki ika iteixpantilis amoxtli tlen itoka “El nahua de la Huasteca y el primer mestizaje. Treinta siglos de historia nahua a la luz de la dialectología”, tlen okihkuilo Dr. Andrés Hasler Hangert. Mtro. Jorge Dolores Bautista okiteixpanti ika kastiyatlahtolli iwan Jazmín Cruz Martínez, momachti tlen UVI Wextekapan Tlalli, okiteixpanti ika nawatl. Dr. Rafael Nava Vite okiyekanki inin teixpantilistli iwan nochipa okamawi ika nawatlahtol. Niman otikkakkeh tlamachtikatzintli Andrés Hasler, akin okintlahpaloh iwan okintlasohkamatili momachtihkeh ika nawatlahtolli.
Momachtihkeh tlen owallahkeh, otekipanohkeh ich eyi tlasentilismeh: 1) Itlahkuilolis nawatlahtol; 2) Nawatlahtol itech kaltlamachtiloyan; 3) Ken wel mochikawaltis iwan moskaltis tlatlamantli nawatlahtolmeh. Nochi omochih ika nawatl pampa ma motlapohkan tlanohnotzalismeh ipan kaltlamachtiloyan ika nawatl. Noihki otikpixkeh tlatlamantli neskayomeh tlen tlatzotzonalli, tlakuikalli, mihtotilistli iwan xochitlahtolli, ika nawatl iwan kastiyatlahtolli.
Tonalli 06 tlen noviembre, Lic. Faustina Hernández Meza, akin omomachti itech UVI, okitexipanti itlatemolis tlen kichihtok ipan maestría. Inin tekitl kitokayotia “La UVI y la vinculación con su entorno social”. Lic. Hernández kichihtok se maestría ompa Bolivia itech se kaltlamachtiloyan itoka Universidad Mayor de San Simón, itech Facultad de Humanidades y Ciencias de la Educación tlen powi itech Programa de Educación Intercultural Bilingüe kampa nochtin tlalnantin andino. Inin tekitl okiteixpanti ipan kastiyatlahtolli iwan nochi tlen omotlahtlapohkeh niman okichihkeh ika nawatlahtolli. Inin tlamantli tekitl amo keman omochih achto, pampa se momachti okiteixpanti tlen itlatemolis iwan okinankili tlahtlanilistli tlen okichiwilihkeh ika nawatl ipan videoconferencia itech Bolivia.
Inin nechikolistli okinkahtewili momachtihkeh pakilistli iwan miak ixtlamachilistli. Yehwan okittakeh ken miak ipati inmasewaltlahtol. Tlamachtihkeh akimeh tekipanowah ika tlahtolmeh, noihki okichikawaltihkeh intlachialis ika tlen kinekih kichiwaskeh se kualli, se yektli tekitl pampa ma mochikawalti masewaltlahtol. Inin tekitl okinexti ken tlamachtihkeh yi omoyolehkeh ika se kualli tlamachtilistli iwan ika tlanawatilli tlen intech powi masewaltlahtolmeh.
Inin nechikolistli omotzak ika se plenaria, se tlanohnotzalistli, kanin okiselihkeh nochtin tlayehyekoltin iwan nochtin mosenkawalismeh tlen okiskeh, iwan nochtin omokahkeh kichiwaskeh inik ome Nawatlahtolnechikolistli ipan 2016, iwan ihkon tikintopewaskeh masewalmeh ma tlapowakan, ma kamatikan masewaltlahtol itech kaltlamachtiloyan iwan itech masewalaltepemeh. Inin área de normalización lingüística itech UVI iwan olocholistli tlen tekipanowa ika tlahtolmeh, kinekih kinchikawiliskeh momachtihkeh, iwan kipatlaskeh tlen amo kualli mochiwa pampa amo ma ixpoliwi masewaltlahtol.
[1] Nepa Wextekapan Tlalli moihtowa “kichihki”. Ininhwantin nochipa kanin kihtowah itlah tlen “opanoh kawitl”, amo kitlaliliah “o-“.
[2] Nepa Wextekapan Tlalli, keman kihtowah itlah tlen “opanoh kawitl” nochipa kitlaliliah “ki”. Tzonkolihkan Nawatl kihtowah “omochih”, Wextekapan tlalli kihtowah “mochihki”
[3] Nepa Wextekpan Tlalli kihtowah “ininhwantin”. Tzonkolihkan Nawatl kihtowah “yehwan”.
Mtra. Daisy Bernal Lorenzo, DUVI
Mtro. Carlos O. Sandoval Arenas, UVI Sede Regional Grandes Montañas
Mtra. María Isabel Miranda Landa, DUVI
Noviembre 6, 2015
Esta Nota publicada también en idioma español en este Micrositio
